Luk 8 | LpxULB | STEP | Iya nafa etiarari Yesu heilutari do doŋiok inno bore gala ho missihi, etito ojo hidofe etiyana saye inno olibo inno Obie no Hollum ho lefahat illo honyie hulo tomon harik ŋaifie honyie.

Luke 8

1 Iya nafa etiarari Yesu heilutari do doŋiok inno bore gala ho missihi, etito ojo hidofe etiyana saye inno olibo inno Obie no Hollum ho lefahat illo honyie hulo tomon harik ŋaifie honyie. 2 Owuon ifa ŋorwo innak innafa efuhai inyeja miniaŋa tara hosie he iŋweiti.Ara ifa nabo Maria na Madalinna nafa efuhai huwo miniaŋa hetterik tara honyie ade. 3 Ojo Joana, noŋorwo Kusa eittok lafa eriŋa habwore no Erode, ojo Susanna, ho ŋorwo aria, innafa eiso do hosie ibariti inno hosie.

4 Iyane, ifa leiba iluluŋ no huwo da mai naboite, ho huwo innafa lafanu do honyie ta massiok inno oluŋa. Ero inyeja do hosie hitiriamita. 5 “Ohu ifa lobo hayani layari hinyomo. Ifa layek inyeja hinyomo nuha, ohuyiek ifa hinnak hinyomo de hikoi, ojo huwo ette hirie isieja, ojo cieŋ inno hide ette hisok ŋahurru isieja. 6 Ohuyek ifa hinnak hinyomo luha do morwari, ifa obolo isie ojo holoŋ ette ŋatohoi nyo obe ifa mai nohosie elik.

7 Arrasa hinyomo hinnak ŋahuyek de hiji ho hukwa, ette hukwa ŋesuru daŋ ho ŋama luha ojo miyaŋ nyie ette ŋatohoi isieja. 8 Hati ohuyek ifa hinyomo ilamuk do huron illo olibo ette ŋasuari ŋama hisihai naboite nala galik”. Ifa eisahak Yesu hiro hirro hunna, ette ŋetisidok hiram nohonyie do hosie hijo, “Itira, Liwuon itai ho yohe inne etira, isiara hetiru.”

9 Niya ette lefahat illohonyie hifi inyeja hojo hetuhutek hitiriamita inne nyo. 10 Ette Yesu hitiraŋ do hosie hijo, “Iwuon itai ho ofioroho no hiyen hirro inno Obie no Hollum, hati etiyana iso huwo iluluŋ te hitiriamita, ‘nyo eriŋa isieja ojo isieja obe leriamik ŋaigonyu, ojo te riŋa obe leriamik hiyen.’

11 Iyane, ojo hitiriamita hunna hijo. Ara hinyomoti Hiram no Hollum. 12 Ara hinyomo hullo lohuyek de hikoi isieja huwo hullo etiru Hiram no Hollum, hati kwak ette Sitan ŋawoŋ ŋakwarari ade Hiram no Hollum ta tajia innohosie, hijo hotobiaŋa isieja eruk ette hitillohini. 13 Ojo luha lohuyek do morwari ara huwo, laŋaitiru Hiram, efwotu hiram to mune, ojo innak hade obe tara hosie; eruk isieja do kai, ojo lara da far no ciama ojo isieja ette ŋahuye ade.

14 Ojo hinyomo luha lohuyek de hiji ho hukwa isieja huwo ille etiru Hiram no Hollum, hati lefie isieja te ikoi nohosie, ojo iwahiti, ibariti he imuniti inno manya ne ta fau ette higor isieja many obiaŋari isieja leriamik ŋaŋerik innak haŋer inno ogol. 15 Ojo hinyomo luha lohuyek do huron inna lanyar ara huwo hullo lowuon ho tajia inno lebis ho inno oliboo, laŋaitiru Hiram, ette hinief tid ne leriamik eyani dihan.

16 Iyane obe lobo leriamik hidie hima ette emuhok do moti, kuyya hidofe ette ŋeirutok aŋolon ho ŋeref. Atti ehumak iso inyeja de hide filili hijo luha ille lejiŋu ahotwai anyar egonyu calai. 17 Obe iso innak hirro eŋofohini obe leriamik ŋalew, kuyya hidofe ne emuho, no lobe iso leriamik alew ette wuana de icala. 18 Ihuma hitira nalanyar, nyo tihoni leyita, ofonihini iso aria, ojo tihoni lo lobe eyita, odumuni iso tere honyie daŋ ho nyie ne eyik hijo layeita injeya.”

19 Ette hotonye ho hilasira Yesu ŋawoŋ do honyie, hati obe ifa isieja onyiha do honyie nyo oluŋa ifa huwo. 20 Elimak ifa lobo tihoni inyeja hijo “Oweita hotonyohoi he ilasira hoi ta bali, awak hiwolo iyye.” 21 Hati ojo Yesu ette hitiriŋak do hosie hijo, “Ara hotonye hanaŋ ho ilasira hanaŋ huwo luha ille letira Hiram no Hollum, ette hiruk.”

22 Owuon ifa do holoŋitek nuha ta nafa lohuye Yesu he lefahat illohonyie ŋajiŋahini da nabo togoli, ette hijo do hosie, “Efie do oko kal ho hari tololo.” Ette isieja ebusari mai nyie. 23 Atti nafa ayirok isieja togoli ahotwai hari, ette Yesu ŋajetori, ojo nabo oyami na hari nologol ette ŋawoŋ do hosie etiara hifioŋ ebulari ahotwai ho togoli ne, owuana ifa isieja do run.

24 Niya afanu lefahat illo Yesu do honyie ette hiticieŋ inyeja ahide, hijo “Leittok, Leittok, aŋaifie iyohoi ye!” Odoito inyeja ette hitiwet oyami ho hifoliaha no hifioŋ many owetari. 25 Ette inyeja hijo do hosie, “Tahu hiruk nahatai?” Ta baŋi nohosie ette isieja hililiha binno ero da kwaitie innohosie, “ŋai illeŋ, le leriamik hitiwet oyami ho hifioŋ, ette isieja daŋ hiruk inyeja?”

26 Ifa leiba isieja da fau ho Jerasenes nafa do holoroŋ na Galilea. 27 Ifa lojo Yesu iliew abali, eiboŋ ifa inyeja ho lobo tihoni lo doŋe nyie. Owuon ifa tihoni lie ho miniaŋa. Holobe ifa inyeja eciefok innamuk boŋojin, obe hidofe amanya da haŋ, atti amanya ifa inyeja de ilumioho.

28 Ifa lewolo inyeja Yesu, oyyo inyeja binno ette ŋarwaŋak kwan da fau do hosiere honyie. leyorrita ette hijo, “Awuon naŋ nyo ko hoi, Yesu, Lenyi Hollum le Hittok, attana naŋ iyye, baŋa etigem naŋ, 29 “Efuhuta ifa Yesu oyiri ne ibot hebusak tihoni le, nyo eniefita ifa inyeja hinyahita arria. Kuyya efit da hido inyeja to ririk ho bileta, Eriria ida hido huwo inyeja, arrasa ŋafutori ojo miniaŋa ette ŋayari ahotwai tim.

30 Nia ette Yesu hifi inyeja, “ŋai fure nohoiŋ?” ojo inyeja ette hitiraŋ, “Oseŋer,” nyo ajiŋak ifa miniaŋa do honyie arria. 31 Arrasa ifa miniaŋa nuha ŋadule tana Yesu hijo hotobiaŋa efuhak isieja a hotwe iwudo.

32 Owuon ifa innak betteha inna lettedita daha to doŋe. Niya ette miniaŋa nuha tana Yesu hefuhak isieja hettejiŋak da betteha nuha. Ette Yesu aŋettek isieja heifie. 33 Afanu miniaŋa tere tihoni ette ŋajiŋak da betteha, ojo betteha ta mai ette ŋaifie a doŋe ette ŋebirok kwaite innohosie da hari na hittok ette ŋadiori

34 Ifa egonyu huwo illafa leribita betteha hirro innafa lowuon, enyoro isieja ofwo ŋailimak do huwo nuha do bore gala ho nuha lowuon do hotwe haŋ. 35 Afanu huwo illafa letiru leriŋari hirro innafa edwoŋ, ette ŋafanu de Yesu orruma tihoni lafa ebusak miniaŋa. Ecofok boŋojin ojo hoo owuon no lobis, le letole de hejek inno Yesu, ette isieja baŋi.

36 Luha illafa egonyu hirro innafa lowuon ŋaifie elimak illamuk hijo olibe tihoni lafa otoŋita miniaŋa. 37 Awahan huwo illo Jerasenes ho onyihari hosie hifi Yesu he’no tere hosie. Abaŋi ifa isieja ette inyeja ŋajiŋak do togoli, ette ŋacahari.

38 Ette tihoni lafa ebusak miniaŋa tana de Yesu hijo “Awak naŋ ŋeino daŋ hoi.” Ojo Yesu ette ŋaifahak inyeja hijo, 39 “Acahari ahaŋ hoi, ihiena hirro daŋ inno olibo inne legiem Hollum do hoi”. Eino tihoni le hikoi nohonyie, ohu hiro do bore gala hirro daŋ arria inne leigiem Hollum do honyie.

40 Ifa acohini Yesu, ette iluluŋ no huwo ta mai efwotu inyeja, nyo etila ifa isieja daŋ inyeja. 41 Niya, aŋawoŋ lobo tihoni lara fure nohonyie Jairas, ara ifa inyeja leittok lo Sinnagog. Ohuyek ifa Jairas de hejek inno Yesu nyo awak ifa inyeja Yesu he’no ahaŋ honyie. 42 Owuon ifa inyeja ho ŋaini honyie naboite, nara ŋasi innohonyie tomon harik, erwahita ifa inyeja binno. Te heno nohonyie, efuduni ifa iluluŋ no huwo do honyie.

43 Owuon ifa nabo hito noŋorwo de nafa odule hosehe nohonyie pulo many da ŋasi tomon harik, eisahak inyeja arobia innohonyie daŋ te ibwana, obe orrumu libe tere lobo hosie. 44 Ette ŋawoŋ okohorwoŋ no Yesu ette hitir hucuŋi no boŋo no Yesu, kwak da mai nyie ette pule nohonyie weita.

45 Ette Yesu hijo, “ŋai ne lotir naŋ?” III ifa lerrisai isieja, ojo Peturu ette hijo, “Eittok, etufuda ilululŋ no huwo iyye.” 46 Ette Yesu hijo, “Eitir naŋ tihoni dede, ayien naŋ hijo ohu ida golon nyie tara naŋ.”

47 Ifa egonyu hito noŋorwo hijo enyiei inyeja enyiak hiŋofita hirro innara eigem inyie, awoŋ daŋ nekikiro, Ahuyek do hosiere ho Yesu, ette ŋasalak do hosiere he iluluŋ no huwo daŋ, eigem inyie hirro inne arrumuni inyie lwaha nohonyie kwak tara Yesu. 48 Niya, eijo inyeja do honyie, “Hito, etilibo hiruk nohoi iyye. Inno na lanyar.”

49 Ojo inyeja harrasa hiro, awoŋ lobo tihoni ta haŋ heittok lo Sinnagog, ette hijo, “Eyiei ŋaini hoi, baŋa etigema hetiyanani.” 50 Ifa etiru Yesu nyie, ette hitiraŋ inyeja, “Baŋa la baŋ. Iruho ania, ojo inyeja ette ŋarrumu hitillohini.”

51 Ifa leiba Yesu da haŋ ho Jairas, obe ifa inyeja lawak lobo tihoni hotojiŋak daŋ ho inyeja, ette ŋaibusak, Peturu, Yoani, Yakobo, ojo monye ho hotonye ho hito. 52 Oyo ifa huwo innafa lowuon ojo innak etteriha inyeja, atti eijo Yesu, “Ibaŋa loyyo. Holobe inyie eyiei, atti ofer inyeja bi.” 53 Hati elohitari ifa isieja Yesu, te hiyen nohosie hijo eyiei hito nyia.

54 Hati ette inyeja hitidet hito ne ta hana, ette hililloŋ hijo, “Hito, tette.” 55 Ette oyiri nohonyie, ŋacohini ette diote ahide kwak. Ette Yesu ŋelimak do hosie heisiara inyeja nabo daha. Eliliha ifa haŋ hose, atti ojo ifa inyeja hotobiaŋa isieja ogiofok lobo tihoni hirro inne.